Die Giant's Causeway is 'n rotsformasie van vulkaniese oorsprong en een van die natuurwonders van Ierland, geleë langs die noordkus van die Noord-Ierse graafskap Antrim, sowat drie myl (4,8 km) noordoos van Bushmills en sowat 60 myl (100 km) noordwes van Belfast. Die gebied bestaan uit sowat 40 000 simmetriese vertikale basaltkolomme met hoogtes van tot ses meter bestaan wat inmekaarpas soos 'n heuningkoek. Dit is deur Unesco in 1986 tot wêrelderfenisgebied verklaar. Binne die Verenigde Koninkryk het dit sedert 1987 die status van nasionale natuurreservaat.
Die grootste deel van die Giant's Causeway is tans in besit van die National Trust wat ook as bestuursliggaam optree en 'n besoekersentrum naby die rotsformasie opgerig het. Terwyl die Trust 'n toegangsgeld vra vir die sentrum, het die publiek gratis toegang tot die rotsformasie via 'n voetpad. Die res van die terrein is in staatsbesit as Crown Estate en in die besit van 'n aantal privaat grondeienaars.
