Die Kazan-katedraal nadat dit in 1993 herbou is.
Die Katedraal van die Kazanse ikoon van Gods Moeder (Собо́р Каза́нской ико́ны Бо́жией Ма́тери, Sobor Kazanskoi ikoni Bozjnei Materi) of Kazan-katedraal (Каза́нский собо́р, Kazanski sobor) is ’n Russies-Ortodokse kerk in die noordoostelike hoek van Rooiplein in Moskou. ’n Kerk het reeds sedert die 1620's op dié plek gestaan, eers van hout en later van stene. Die huidige katedraal is in 1993 herbou.
Die naam kom van die Kazanse Ikoon van Gods Moeder, wat eeue lank al deur die Russies-Ortodokse gelowiges geëerbiedig word. Nadat Koezma Minin en prins Dmitri Posjarski in 1612 ’n leër op die been gebring het om die Pole uit die Kremlin te verdryf, het die prins ’n kerk met sy eie geld laat bou. Hy het glo verskeie kere tot die ikoon gebid tydens die stryd teen die indringers.
Dit stem ooreen met die Russiese tradisie om kerke te laat bou om belangrike oorwinnings te vier, nes die geval was met die Sint Basilius-katedraal op die plein, wat gebou is om die Russe se oorwinning oor die Tartare te vier.
Nadat die aanvanklike kerk in 1632 deur ’n brand verwoes is, het die tsaar opdrag gegee dat ’n steenkerk op die plek gebou word. Dit is in Oktober 1636 ingewy. Dit is daarna soveel gerestoureer dat die oorspronklike ontwerp verlore gegaan het. In 1929–1932 is die kerk se buitekant heeltemal herbou volgens die oorspronklike ontwerp.
Josef Stalin het die katedraal in 1936 saam met ’n paar ander historiese geboue laat sloop om plek te maak vir groot militêre voertuie tydens Sowjet-parades. Ná die verbrokkeling van die Sowjetunie was die Kazan-katedraal die eerste kerk wat herbou is. Dit is in 1993 voltooi.
| Bakens aan Rooiplein | ||
|
||
