Salvador da Bahia is die derde grootste stad in Brasilië en die hoofstad van die deelstaat Bahia. Dit is aan die Allerheilige-baai in die ooste van die land geleë. Die voormalige Portugese naam São Salvador da Bahia de Todos os Santos, wat "Heilige Verlosser van die Allerheilige-baai" beteken, verwys na die datum van sy ontdekking (1 November 1501) deur die Portugese seevaarder Gaspar de Lemos en sy destydse vergissing - hy het die Allerheilige-baai as 'n riviermonding beskou.
Salvador da Bahia het in die tydperk tussen 1501 en 1763 as die administratiewe hoofstad van Brasilië gedien en hierdie funksie daarna aan Rio de Janeiro aan die suidkus van die land afgestaan. Salvador da Bahia se huidige stadsgebied het 2,68 miljoen inwoners, terwyl sowat 3,57 miljoen mense in die metropolitaanse gebied van Salvador woon (2010).
Die historiese stadskern Salvador da Bahia word sedert 1985 deur UNESCO as 'n wêrelderfenisgebied gelys.
Die Nederlandse Wes-Indiese Kompanjie het hierdie stad in 1624 verower onder leiding van Jacob Willekens. Destyds was Bahia die hoofstad van Portugees-Brasilie. Die stad is een jaar later egter reeds herower deur die Portugese.
